السلام عليكم ورحمت الله وبركاته
إخواني عندي كلام أريد أقوله لكم وأريد وجهة نظركم
وأنا ما أقول هذا الكلام من فراغ ولا علشان أفتري على أحد
هذا الكلام حق وماحرام ولا عيب إذا أحد يقول الحق
أسألكم وين الأمان اللي يتكلمو عنه بعض الناس ويقولو أن البلاد فيها أمان ووين الأمن القوي اللي نسمع عنه!!
قبل سنوات كانت البلاد فيها أمان
بس الآن للأسف الشديد البلاد مافيها أمان أبداً
وجهاز الأمن للأسف الشديد تعبان كثير بشكل لايتصور
وخاصّة قسم التحريات والتحقيقات الجنائية
أنا اللي أعرفه عن جهاز الأمن بأنه مطوّر بأحدث التقنيات
وفيه خُبراء جنائيين بس للأسف ماأدري ليش مافيه إهتمام
يعني لازم صاحب القضية عنده واسطه علشان يهتمو بموضوعه!!!
إخواني أنا صحيح تكلمت عن جهاز الأمن بس ما كتبت شي من عندي ولا قلت كلام من فراغ تراه هذي الحقيقة
وهذا اللي جالس يصير في البلد
إخواني أنا تعرضت لحادثة سرقة من فترة طويلة أنسرقت عني شاحنة قاطرة ومقطورة وبلّغت أقرب مركز شرطة وفي أقرب وقت بعد السرقة وللأسف الشديد ماحصلت الشاحنة ولا شي أخبار عنها إلى الآن.
لما بلّغت المركز عن السرقة طلبو منّي أتصل بقيادة منطقة الباطنة علشان أعطيهم بيانات الشاحنة وأكد لهم بلاغ السرقة
ياجماعة الخير هل من المفترض أني أنا أقوم بالتواصل مع قيادة الباطنة أم المركز الذي قدمت فيه البلاغ؟؟
ونفس الشي لما قدمّت البلاغ خبرتهم بأني أشّك في بعض السائقين كانو يقودو هذي الشاحنة ومايستبعد وجود نسخة من المفتاح عندهم علماً بأن الشاحنة كانت مغلقة وليست في وضع التشغيل وأعطيت رجال الشرطة أسماء وأرقام هواتف هؤلاء الأشخاص الأجانب المشتبه فيهم لذلك أنا سهّلت على رجال الشرطة في البحث والتحقيق في الموضوع
وكل ماراجعت المركز يقولو ماشي جديد في الموضوع وبعد مراجعات متكررة قالو ماأستطعنا التوصّل للأشخاص لأن هواتفهم مغلقة
يعني خلاص أنقطعت كل الوسائل والسبل للتوصل إلى السارق أو المشتبه فيهم؟؟ يعني خلاص مافيه أمل للتوصل للشاحنة؟؟
وين الشرطة اللي نسمع عنهم ووين الأمن ووين التحريات
كل هذي التقنيات الحديثة وفي النهاية ماقدرو يتوصلو لحل هذي المشكلة؟؟
وللعلم شي مئات أو ألاف السرقات وماتوصلو لنتائج عنها
أنا بنفسي السرقات اللي عرفتهعن وسمعت عنهن فهذا الشهر 5سرقات وكلهن سرقات شاحنات
للعلم سرقات الشاحنات غالباً تحدث من الأجانب , يعني صارو الأجانب عندهم جراءة كبيرة وصارو مايخافو من الشرطة
ياجماعة الخير فكرو معي شوي هذي الشاحنة كبيرة من نوع قاطرة ومقطورة, مابالسهل تتنقل من مكان لأخر وخاصة في شوارع مسقط , يعني وين بتروح ووين بيهرب السارق عن الشرطة؟؟
في النهاية مليّت من كثر مراجعاتي لمركز الشرطة وبعدين طلبت منهم يعطوني رسالة لشركة التمويل علشان يأخرو الشيكات لأن باقي على الشاحنة أقساط سنتين بمبلغ 34ألف ريال
وصارلي أسبوعين أراجعهم علشان أستلم الرسالة
مرة أحصل الشخص اللّي يكتب الرسائل مامداوم ومرة يقولو عندنا زحمة تعال بكرة ومع أني أجي من مكان بعيد وأرجع بدون فائدة
وقدّمت رسالة للمفتش العام ولحين أكثر من أسبوعين أنتظر الجواب
أنا أعرف أن عندهم ضغط وزحمت عمل بس نفس الشي كلما عجلّو في البحث يكون أفضل لأن السارق يحاول يتصرّف ف الشاحنة فأسرع وقت, وكل تأخير يصير ما بيكون من صالحنا
والأن مابقى عندي شي أسويه إلأ التضرع للخالق عز وجل بأن يرفع عنّي هذي المصيبة ويوفقني في حل هذي الأزمة
إخواني هذا الكلام اللّي أريد أوصلّكم أياه ونصيحتي لكم تكونو حذرين وماتحطّو سياراتكم مفتوحة وتروحو عنها حتى ف مكان قريب , مادام هذي شاحنة موقفة ومغلقة وأنسرقت فكيف إذا كانت سيارة خفيفة
هذا ودمتم في رعاية الله وحفظه
منقووووول للإفادة