يقولون إن الزين بس للصبايا
حكي الجياكر صدق مأخوذ خيره
عندي حبيب فيه كل المزايا
فوق الشهامه أشهد إنه دميره
له نظره تسوي سواة وسوايا
ورزت عقال ماهي لحد غيره
غمازتين هناك صوب الشفايا
ونظرات عين يالخلايق خطيره
ودي أشوفه كل لحظه معايا
عيني بصيره لكن يدي قصيره
صرت المحه في عين كل الزوايا
وأموت لاجاء ذكره باي سيره
أترك عشانه كل عمري ورايا
وأبني له في وسط الحشى الف ديره
سبحان من خلى الحسن فيه آيا
قلبي هواه ومدري وشو مصيره
من يوم شفته الوصل صار غايا
ورسمت في لحظه أماني كبيره
وأظن إني تناسيت كل البلايا
عيوبه صارت في عيوني صغيره
كحيان ومنتف قليل العطايا
بس اشعر بظله كأني أميره
يرمي سهام العشق أحسن رمايا
وينيشن قليبي وينثر عبيره
كذاب ويحلف ماله سوايا
واذا جاء يناديني يقولي سميره
لكن أحبه يا بلاه وبلايا
أبقى أتحمل سلبيات كثيره
لأني وهبته الروح وأجمل هدايا
حبا على أخلاصنا على شوي غيره
صرت أعذره وأهين به في عمايا
أقول يرجع لي يعقل مسيره
جنن قلوب الناس وأحلى الصبايا
وطير قليبي ملعون خيره